ဘ၀မှာ အောင်မြင်ချင်ရင် တရားထိုင်ပါ

တရားထိုင် တယ်ဆိုတဲ့စကားလုံးကိုမြင်တာနဲ့ လူတော်တော်များများက နိဗ္ဗာန်ရောက်ကြောင်းကို ပဲ ပြေးပြီး မြင်ကြတယ်။ ငါတို့က လောကီစည်းစိမ်တိုးတက်ချင်တာမို့ ဂါထာရွတ်မယ် အဓိဌာန်ဝင်တာတွေပဲစိတ်၀င် စားတယ်လို့ တချို့ပြောကြပါတယ်။ ခု ကမ္ဘာမှာ အချမ်းသာဆုံး သူဌေးတွေဟာ အဓိဌာန်လဲ မ၀င်ကြသလို ဘာသာခြားများဖြစ်နေတာ တွေ့ရပါလိမ့်မယ်။သူတို့ဘာလို့ အောင်မြင်နေကြတာလဲ ။ စဥ်းစားကြည့်ရအောင်။ ဘာသာခြား ဖြစ်ပြီးဘာလို့ သူတို့မှာ ကံကောင်း ချမ်းသာပြီး ကိုယ်တွေဘာလို့ ဆင်းရဲ နေရ စစ်ဘေး မင်းဘေး သဘာ၀ဘေးတွေနဲ့ တွေ့ နေရတာလဲ လို့ ကျနော်ငယ်ငယ်က အမြဲတွေးမိတယ်။ စာပေတွေဖတ်ရှုတာ များလာတော့ ဆက်စပ်မိတာ တွေကိုရေးပြချင်ပါတယ်။ နံပါတ်တစ်အချက်က ဘုရားက သူ့ဘာသာ၀င်မှ ချမ်းသာမယ် ကျန်တဲ့ဘာသာ၀င် တွေဆင်းရဲမယ် မပြောခဲ့ပါဘူး။ ဘုရား က လောကကြီးရဲ့ အမှန်တရားလေးပါးကိုပဲ ပြောပြသွားတာပါ။ သစ္စာလေးပါးပေါ့။ခုတရားထိုင်တာကိုပဲ ပြောပြချင်တယ်။ 

 Apple IPhone ဖုန်းတွေကို တည်ထောင်တဲ့သူ ဖြစ်တဲ့ စတိဗ်ဂျော့ ဟာ တရားထိုင်သူတစ်ဦးဖြစ်ပါတယ်။ ဗုဒ္ဓဘာသာ ကို အိန္ဒိယ သွားရင်း ရှာဖွေတွေ့ရှိခဲ့သူပါ။
နောက်တစ်ဦးက Twitter Founder ဂျက်ဒေါ်သီ ပါ ။ သူဆိုရင်မွေး နေ့မှာ မြန်မာပြည်အထိ လာရောက်ကာ နေရာအနှံသွားပြီး တရားထိုင်ခဲ့သူဖြစ်ပါတယ်။ မြန်မာပြည်ထိ လာရောက်ပြီး ဂေါတမရဲ့ သင်ကြားခဲ့အတဲ့အတိုင် ထိန်းသိမ်းထားတဲ့ authentic အဖြစ် ဆုံး တရားထိုင်နည်းကို သင်ယူချင်လို့ဖြစ်တယ်လို့ သူ့ရဲ့ twitter account မှာရေးသားခဲ့ပါတယ်။ ထေရ၀ါရ ဗုဒဘာသာကို မြန်မာပြည် မှာရှေးမူမပျက် ကျင့်သုံးဆဲမို့ပါ။ 

 နောက်ထပ် နာမည်ကြီး ကမ္ဘာကျော်များဟာ ဘာသာမျိုးစုံ ကိုးကွယ်နေကြပေမဲ့ တရားထိုင်ခြင်း အာနာပါန ကို နေ့စဥ်ဘ၀မှာ ကျင့်သုံးနေမှုဟာ ကျနော်တို့ထက်ပိုများပါတယ်။ ဘာဖြစ်လို့ ပြုလုပ်ကြတာလဲဆိုတော့ လက်တွေ့အကျိုးရှိတာကို သူတို့ သိမြင်လို့ ဖြစ်ပါတယ်။ တရားထိုင်ခြင်းကြောင့် စိတ်လွင့်ပါးမှုရော့နည်းလာမယ်။ အာရုံစူးစိုက်နိုင်တယ်။အလုပ်မှာ စိတ်လွင့်ပါးမှုနည်းရင်း အမှားနည်းပါတယ်။ စိတ်ကြည်လင်နေရင် အမှားအမှန်ကို ပိုပြီး မြင်လာတယ်။ စိတ်ကို လောဘ၊‌ ဒေါသ လွှမ်းနေရင် ဆုံးဖြတ်ချက်တွေပိုမှားပါတယ်။ အမှားတွေနည်းလာရင် အားလုံးဟာ ပိုပြီးအဆင်ပြေလာပါလိမ့်မယ်။



မြန်မာပြည်မှာ တရားထိုင်ကျသူတွေ အများကြီးရှိတာ ဘာလို့ မအောင်မြင်တာလဲ

၁။ လူငယ် တွေထဲမှာ တကယ်တမ်းလက်တွေ့မှာ တရားထိုင်သူဟာ အင်မတန်နည်းပါတယ်။ ဘုရားရှိခိုးမယ် ပုတီးစိတ်မယ့်သူ နဂါးတွေအစာကျွေးတဲ့သူ ပေါပါတယ်။ တရားထိုင်ခြင်းကို စိတ်ပါလက်ပါ လေ့လာသူလဲ ရှားပါတယ်။

၂။ ကျနော်တို့ဟာ ‌ရေခံမြေခံမကောင်းပါဘူး။ ပြောချင်တာက ပတ်၀န်ကျင်ကောင်းမဟုတ်ဘူး ။ တိုင်းပြည်ကောင်း အစိုးရကောင်းမဟုတ်ဘူး။ ဒါဟာ အင်မတန်အရေးကြီးပါတယ်။ ဒီမြန်မာပြည်က လူငယ်တွေအတွက်အခွင့်အလမ်းဟာ ခုချိန်ပိုလို့ပင်ရှားပါတယ်။ နိုင်ငံခြားသွားမယ် ဆိုရင်တောင် အလိမ်ခံရဖို့ ၈၀ ရာခိုင်နှုန်း ရှိပါတယ်။ ဒါပေမဲ့ ဒါကိုပဲပုံချပြီး မကြိုးစားပဲနေမလား ။ နောက်မှာဆက်ပြောပါမယ်။

၃။ကိုယ်ဖြစ်ချင်တာဖြစ်ဖို့ အားစိုက်ထုတ်ရမယ်။ စျေးရောင်းကောင်းချင်ရင် လူတွေကို ကိုယ့်ဆီစျေး၀ယ်လာအောင် ဘယ်လို နည်းလမ်းတွေသုံးမလဲ လေ့လာရမယ်။ ကျနော်တို့ လူမျိုးဟာ ကော်ပီ ကူးရတဲ့ အဆင့်ပဲ ရှိပါတယ်။ စွမ်းဦးတီထွင်သူအဆင့်မဟုတ်ပါဘူး။ ကျနော်တို့ အောင်မြင်တဲ့ သူတွေရဲ့ နည်းပညာတွေကို လေ့လာရမယ် အသုံးချရမယ်။ အဲဒိအဆင့်ကိုကို မရောက်နိုင်ဖြစ်နေပါတယ်။
ဂါထာတွေရွတ်တယ်ဆိုတာလဲ တရားထိုင်ခြင်းတစ်မျိုးပါ။ တရားထိုင်ခြင်းကတော့ ပိုပြီးအဆင့်မြင့်ပါတယ်။

အမေပြောနေကျ ဆိုရိုးတစ်ခုရှိပါတယ်။

“ ဘုရားလဲကူ နတ်လဲထူ နောက်ချေးလဲချ ငါလဲထ “ ဒီစာလေးကို ကျနော်နားလည်သလိုဘာသာ ပြန်ရရင်


ဘုရားလဲကူ
ဘုရားကူဖို့ ဘုရားရှိခိုးပါ။ ဘယ်ဘုရားဖြစ်ဖြစ်ပေါ့။ ဘုရားရှီခိုးတာဟာ ဘုရားကို ဒီနေ့ ဒီ ၅ ပါးသော သီလကို မပျက်အောင်ထိန်းမယ်ဆိုပြီး ကတိပေးတာပါ။ ဘုရားဂုဏ်တော်တွေ ရွတ်ဆိုတာဟာ ဘုရားကိုချီးမွန်းတာပါပဲ။ ချီးမွန်းတာနဲ့ ကဲ့ရဲ့တာ နှစ်ခုမှာ ချီးမွန်းတာဟာ ကောင်းတယ်ဆိုတာ လူတိုင်းသိပါတယ်။ ကောင်းသောစိတ်ကလေးတွေဖြစ်ပြီး ကောင်းသောကံတွေပြုလုပ်နေခြင်းပါ။

နတ်လဲထူ

ဘုရားတရားလုပ်ရင်ကောင်းသောနတ်တွေက ချစ်ပါတယ်။ နတ်တွေကို ပူဇော်ပသလေ့ရှိသူများလဲ ပူဇော်ပသပါ။ ကျနော်လဲယုံကြည်သူပါ။ ယုံကြည်ပါ မရူးသွပ်ပါနဲ့။

နောက်ချေးလဲချ

လယ်ယာမြေတွေကောင်းအောင် နွားချေး(နောက်ချေး) ကိုမစိုက်ပျိုးမီမှာ လယ်သူကြီးတွေဟာ စိုက်ပျိုးမြေထဲကို ထည့်လေ့ရှိကြပါတယ်။ ယခုကျနော်တို့ဆီမှာဖြစ်ပျက်နေတဲ့ ကောင်းခြင်းဆိုးခြင်းတွေဟာ အရင်ဘ၀ကံတွေကြောင့်ပါ။ အရင်ဘ၀ ကံအကျိုးပေးလဲရှိဖို့လိုအပ်ပါတယ်။ကျနော်တို့ အရင်ဘ၀ ကံအပေါ်မှာ ဘာမှပြုလုပ်လို့မရပါဘူး။ ကျနော်တို့ ပြုလုပ်လို့ရတာ နောင်အချိန်မှာ အသီးအပွင့်တွေခံစားနိုင်ဖို့ အတွက် ကောင်းမှုတွေကို ပြုလုပ်ခြင်းဖြင့် ကျနော်တို့ လယ်ယာမြေကို နွားချေးထည့် ကြရပါမယ်။ ကံဆိုတာ ပြုလုပ်ခြင်းဖြစ်ပါတယ်။ လေ့လာကြိုးစားလုပ်ကိုင်နေခြင်းသည် ကောင်းသောကံကို ပြုလုပ်နေခြင်းပါ။ ကောင်းတဲ့ ကံဆိုတာ သူတပါးကူညီခြင်း လှူတန်းခြင်းစတဲ့ ဘုရားဟော ကောင်းမှူတွေပါသလို မိမိရဲ့ ဖြစ်ချင်တဲ့ အလုပ်အကိုင် စီးပွားရေးမှာ ကြိုးစားလုပ်ကိုင်တာဟာလဲ ကောင်းသောကံ နွားချေးကို သင့်လယ်ယာမြေထဲချချင်းပါဘဲ။


ငါလဲထ

ကိုယ်ကလဲကြိုးစားရမယ်။ ကိုယ်က ဘာမှမလုပ်ရင်တော့ ဘာမှ ဖြစ်မလာပါဘူး။ ၀န်ထမ်းလုပ်ပြီး သူဌေးဘာလို့မဖြစ်တာလဲ မေးစရာမလိုပါဘူး။ အလုပ်ထွက်ပါလို့ပြောတာမဟုတ်ပါဘူး။သူဌေးဖြစ်ချင်ရင် ဖြစ်နည်းကို ရှာဖွေ လုပ်ကိုင်နေရပါမယ်။ တရားထိုင်ခြင်းသည် ကိုယ်ကလဲ ထကြိုးစားခြင်းပါ။ ကိုယ်အရည်အသွေးတက်လာဖို့ တရားထိုင်ပါ။ အာရုံစူးစိုက်လေ့လာနိုင်ဖို့ တရားထိုင်ပါ။ နောင် တချိန်မှာ အကျိုးရှိမဲ့ ပညာသင်ယူခြင်း ပတ်၀န်းကျင်ကောင်းကို ပြောင်းရွှေ့ခြင်း ပြုလုပ်ရပါမယ်။ ပတ်၀န်းကျင်ကောင်းကို ပြောင်းပါ။ ဇယ်တောက်ခုံမှာထိုင်ပြီး သူဌေးကြီးဖြစ်ချင်လို့မရပါဘူး။ ဖြစ်အောင်လုပ်ပေးနိုင်တဲ့ ပတ်၀န်းကျင်ကို ပြောင်းရပါမယ်။

မြန်မာပြည်ကလူများဟာ ပထမ နှစ်ချက်ကို ပြုလုပ်ကြပါတယ်။ ကိုယ်လဲထဖို့လိုတယ် ။ ဘုရားဟာ သိပံနည်းအကျဆုံး လမ်းစဥ်ကို ချပေးခဲ့ပါတယ်။ လာဘ်ခေါ်ဂါထာရွတ်ပြီး ဘာလို့စျေးရောင်းမကောင်းလဲ ။ ကိုယ့်ရောင်းတဲ့ ပစ္စည်းကစျေးကြီးနေမယ် အရည်းအသွေးညံ့နေရင် ဘယ်လိုမှ‌ရောင်းမကောင်းပါဘူး။ဒါကို ကောင်းအောင်မကြိုးစားသရွေ့ မကြီးပွားနိုင်ပါကြောင်းပါ။ ငါလဲ ထကြပါ။